थर्ड आय आशियाई चित्रपट महोत्सवात ६० हून अधिक देशी-विदेशी चित्रपटांची अनोखी मेजवानी
आंतरराष्ट्रीय पातळीवर गाजलेला आणि कान महोत्सवात ‘अ-सर्टन रिगार्ड’ विभागात सर्वोत्तम ठरलेला चायनीज चित्रपट ‘ब्लॅक डॉग’ २१ व्या थर्ड आय आशियाई चित्रपट महोत्सवाचा पडदा उघडणार आहे. या महोत्सवाचे उद्‌घाटन महाराष्ट्र फिल्म स्टेज अँड कल्चर डेव्हलपमेंट कॉर्पोरेशनच्या (MFSCDCL) व्यवस्थापकीय संचालक श्रीमती स्वाती म्हसे पाटील यांच्या हस्ते होणार आहे.
उद्‌घाटन सोहळा १० जानेवारी २०२५ रोजी सायंकाळी ६.३० वाजता अंधेरी येथील मुव्ही मॅक्स चित्रपटगृहात आयोजित करण्यात आला आहे. या सोहळ्यात चित्रपट क्षेत्रातील योगदानाबद्दल सुप्रसिद्ध पटकथा लेखक आणि गीतकार जावेद अख्तर यांना ‘एशियन कल्चर’ या विशेष पुरस्काराने सन्मानित करण्यात येणार आहे.
आशियाई चित्रपटांचा बहारदार अनुभव
१० ते १६ जानेवारी २०२५ या कालावधीत मुंबई आणि ठाणे येथे हा महोत्सव पार पडणार आहे. यामध्ये आशियातील विविध देशांतील एकूण ६० हून अधिक चित्रपट प्रेक्षकांसाठी प्रदर्शित करण्यात येणार आहेत.
फेस्टिव्हल डिरेक्टर संतोष पाठारे यांनी दिलेल्या माहितीनुसार, “आज हॉलिवूड आणि युरोपमधील चित्रपट भारतीय प्रेक्षकांना सहज उपलब्ध होत आहेत, परंतु आशियाई चित्रपट प्रेक्षकांपर्यंत पोहोचत नाहीत. या महोत्सवाच्या माध्यमातून आंतरराष्ट्रीय स्तरावर लोकप्रिय ठरलेल्या चित्रपटांची मेजवानी महाराष्ट्रातील प्रेक्षकांना मिळवून देण्याचा आमचा प्रयत्न आहे.”
या महोत्सवामध्ये आशियाई संस्कृती, समाज, राजकारण आणि जीवनशैली यांचे दर्शन घडवणारे विविध शैलीचे चित्रपट प्रदर्शित करण्यात येणार आहेत. चित्रपट प्रेमींसाठी ही एक मोठी संधी असून या महोत्सवात दर्जेदार आशियाई चित्रपटांचा आस्वाद घेता येणार आहे.
चित्रपट रसिकांसाठी एक पर्वणी
थर्ड आय आशियाई चित्रपट महोत्सव हा आशियाई चित्रपटांच्या प्रसारासाठी एक महत्त्वाचा व्यासपीठ ठरत आहे. या महोत्सवाच्या माध्यमातून प्रेक्षकांना केवळ मनोरंजनाचाच नव्हे, तर वेगवेगळ्या संस्कृतींचा आणि आशियाई चित्रपटांच्या कलात्मकतेचा अनुभव घेण्याची संधी मिळणार आहे.
थर्ड आय महोत्सवाचे वैशिष्ट्य म्हणजे यामध्ये जगभरातील चित्रपट महोत्सवांमध्ये गाजलेले चित्रपट दाखवले जातात, जे इतरत्र सहज उपलब्ध होत नाहीत. त्यामुळे हा महोत्सव चित्रपट रसिकांसाठी एक अनोखी पर्वणी ठरणार आहे.
