‘चिकी चिकी बुबूम बुम’ मध्ये रंगणार धमाल रियुनियन पार्टी
पार्टी म्हटलं की धमाल, मजा आणि जंगी सेलिब्रेशन आलंच! अशाच एका धमाकेदार रियुनियन पार्टीसाठी मराठीतील नावाजलेले कलाकार एकत्र आले आहेत. ‘आईच्या गावात बाराच्या भावात घरात नुसता गोंधळ हो’ म्हणत या कलाकारांनी सेलिब्रेशनचा उत्साह दुप्पट केला आहे. ‘बुम बुम बुम बोंबला जीव हा टांगला’ अशा ठेका धरायला लावणाऱ्या गाण्यांसह प्रेक्षकांची उत्सुकता वाढवणारा हा चित्रपट आता चर्चेत आहे.
‘चिकी चिकी बुबूम बुम’ या चित्रपटाचे धमाकेदार पार्टी टायटल साँग
‘चिकी चिकी बुबूम बुम’ या चित्रपटाचे थिरकायला लावणारे पार्टी टायटल साँग नुकतेच प्रदर्शित झाले असून, रसिक प्रेक्षकांनी त्याला उत्तम प्रतिसाद दिला आहे. प्रशांत मडपुवार लिखित या हॅपनिंग साँगला रोहन-रोहन जोडीचे जबरदस्त संगीत लाभले आहे, तर रोहन प्रधान यांच्या दमदार आवाजाने हे गाणे अधिक जल्लोषमय झाले आहे. नृत्यदिग्दर्शन राहुल ठोंबरे यांनी केले असून, हे एनर्जेटिक गाणे विशेषतः तरुणाईला प्रचंड आवडणार आहे.
तगडी कलाकारांची फौज
स्वप्नील जोशी, प्रार्थना बेहरे, प्राजक्ता माळी, प्रसाद महादेव खांडेकर, रोहित माने, प्रथमेश शिवलकर, नम्रता संभेराव, वनिता खरात, सचिन गोस्वामी, ओंकार राऊत, प्रियदर्शनी इंदलकर, अभिजीत चव्हाण, निखिल रत्नपारखी, प्रभाकर मोरे, चेतना भट, निखिल बने, श्याम राजपूत, ऐश्वर्या बडदे, श्लोक खांडेकर, प्रमोद बनसोडे यांसारख्या दिग्गज कलाकारांची फौज ‘चिकी चिकी बुबूम बुम’ मध्ये हास्याची आतषबाजी उडवणार आहे. या चित्रपटात हास्याची कारंजी, धमाल-मस्ती आणि मनोरंजनाची पर्वणी प्रेक्षकांना अनुभवता येणार आहे.
२८ फेब्रुवारीला थिएटरमध्ये धमाका
नारकर फिल्म्स अँड एंटरटेनमेंट निर्मित, आयडियाज द एंटरटेनमेंट कंपनी प्रस्तुत आणि स्वर्ण पट कथा आणि प्रजाकार प्रोडक्शन्स यांच्या सहयोगाने येणाऱ्या या चित्रपटाचे दिग्दर्शन प्रसाद महादेव खांडेकर यांनी केले आहे. सुनील नारकर हे चित्रपटाचे निर्माते असून, सेजल दिपक पेंटर आणि प्रसाद महादेव खांडेकर सहनिर्माते म्हणून या चित्रपटाशी जोडले गेले आहेत. चित्रपटाचे लेखन प्रथमेश शिवलकर आणि प्रसाद महादेव खांडेकर यांनी केले असून, छायांकनाची जबाबदारी गणेश उतेकर यांनी सांभाळली आहे.
या धमाकेदार रियुनियन पार्टीचा आनंद लुटायचा असेल, तर २८ फेब्रुवारीला ‘चिकी चिकी बुबूम बुम’ थिएटरमध्ये नक्की पहा!
